موضوع: يوووووووووووووه.....تانى عن الحجاب الأربعاء أغسطس 05, 2009 11:49 am
السلام عليكم ورحمة الله وبركاته ازيكم يا احلى اعضاء تكملة للموضوع الى فتحه الزميل حمادة حبيت افتحه تانى لعل بنات المنتدى يستفيدوا منه وبجد انا مش اقصد حاجة ولا اقصد اهانة لأى حد انا يهمنى اشوف الناس ماشيى فى الطريق الصح "يوووووووووه...تاني عن الحجاب ؟؟!"
ماشية عادي...سمعت..."بست....بست..." التفتت ناحية الصوت...لقت واحدة صاحبتها...استغربت وراحت ناحيتها... صاحبتها سلمت عليها وحطت حاجة في إيدها.... بصت في إيدها..إيه ده...شريط كاسيت.....واسمه ؟؟ "الحجاب"... "يوووووووووووووووووه !! تاني عن الحجاب !! طب ما أنا متحجبة !!!!! " -------------- يا تري هل هي فعلا متحجبة ؟؟ احنا منقدرشي نقول لأ..فعلا فيه حاجة ملفوفة حوالين شعرها...بس للأسف صعب تحكم عليه أنه "حجاب"... هي لابساه حوالين شعرها ...بس ده حجاب ؟؟ كلمة "حجاب" أصلا يعني بيحجب...بيمنع يعني بيغطي...وده مش متوافر في اللي هي لابساه... طب تعالي نفكروا كده نشوف...إيه هو الهدف من الحجاب ؟؟ إيه لازمته ؟؟ المفروض أنه يحمي البنت المسلمة ويعفها ويمنع عنها ذئاب البشر....وكمان علشان نحمي شباب المسلمين من فتنة النساء...الشباب اللي عينيهم باظت من كتر النظر للنساء... أيوة معاكي حق...فعلا الشباب اللي بيلقوا بصرهم علي البنات هم غلطانين أنهم مشبيغضوا بصرهم..صح..بس برضه البنت دي مشتركة في الخطأ.. هتقولي لي "إزاي ما هي متحجبة ؟!"..أقول لك هل حجابها ده فعلا منع الشباب من أنهم يتفتنوا؟؟ طب ده فيه أنواع من الحجاب دلوقتي بقت هي أصلا مدعاة للفتنة وإثارة الشهوة !! تخيلي يا أختي !! المفروض الحجاب يخفي جمالك عن العيون ...صح ؟ طب هل حتة القماش الرقيقة الصغيرة الملونة الملفوفة حوالين شعرك دي هي اللي أخفت جمالك فعلا ومنعت الفتنة ؟؟ لأ ! وده مش رأيي الشخصي ده رأي الشباب الأولاد نفسهم !
هل الكولونيا الجميلة اللي أنت حطاها دي بتمنع الفتنة ؟؟ ولا بتزودها ؟؟؟ طب الكولونيا دي ليه ؟؟ مش هي زينة ؟؟ والمفروض زينتك متظهرشي غير لزوجك ..صح ؟؟ وبعدين الحديث واضح في النقطة دي .. قال رسول الله صلي الله عليه وسلم: ((أيما امرأة استعطرت فمرت على قوم ليجدوا من ريحها فهي زانية )) حديث حسن ربنا يحفظك يا أختي,,,.. هل البودي والبنطلون الضيق جدا والجيبة القصيرة أو الضيقة والمفتوحة كل دول بينمعوا الفتنة ولا بيزودوها ؟؟ هل المناكير والمعرفشي إيه ده بيمنع الفتنة ؟؟؟ بالله عليكي يا أختي فكري مع نفسك ...مش معقولة نضحك علي نفسنا أننا عاملين الصح.. احنا عايزين الجنة يا أختي مش الدنيا...مش مشكلة لما نتعب الكام سنة بتوع الدنيا دول علشان نوصل للجنة برحمة الله وربنا يرزقنا الخلووووووود فيها...
أختاه...مينفعشي حجاب مع زينة... سواء كانت الزينة دي في اللبس أو في العطر أو الحجاب نفسه ....ده يتعارض مع ده...
وبعدين احنا عمالين نستورد موضات من الغرب...لأ وكمان بقوا يعملوا موضات للمحجبات...مقطع وملون و ضيق...تحت اسم "الموضة"...وللأسف بناتنا المسلمات بينجروا وراء هذه الضلالات والعياذ بالله... حتي الحجاب حولوه أعداؤنا لفتنة !!!
ده كمان فيه مشكلة تانية...البنات اللي بيلبسوا الحاجات دي وفاكرين أنهم كده لبسوا الحجاب الشرعي وبقوا أحسن ناس...كده كل ما يقابلوا كتيب أو شريط أو حتي حد يتكلم عن الحجاب مش بيهتموا...بيعتبروه متوجه لحد غيرهم للي مش متحجبين أصلا... احنا مش بنقول أن أنت متساوية مع اللي مش متحجبين خالص...لأ طبعا...بس احنا عايزين نفس الحجاب اللي الإسلام أمر بيه...عايزين حجاب الصحابيات وأمهات المؤمنين....مش عايزين حجاب اليومين دول... أنت عايزة تدخلي الجنة مع أمهات المؤمنين...صح ؟؟ يبقي اعملي زيهم !! البسي زيهم !!...يللا يا أختي...
علشان كده كل شوية بنتكلم عن الحجاب...حتي فيه أخوات ملتزمات يستغربوا ليه معظم – إن لم يكن كل – الكلام الموجه للفتيات بيكون عن الحجاب ؟؟!! والسبب أن النقطة دي مهمة جدا وللأسف واقعة عند بنات كتير...فاهمنيها غلط...
وأنت يا أختي لازم تتأكدي أن أنا عايز مصلحتك...أنا عارف أن لهجتي ممكن تكون تقيلة شوية...أرجو متزعليش مني...بس المشكلة أن الموضوع زاد عن حده أوي...أصل ده مش مجرد خطأ بتعمليه..لأ ده إثم كل مرة تلبسي اللبس ده تأخذي ذنب...وذنب للشباب اللي ممكن يتفتنوا بسبب اللبس ده...تخيلي لو جئتي بصلاة وصيام...وزكاة وقيام...لكنك فتنتي وفتنتي..في الكلية وفي الشارع وفي المواصلات...كل مرة وكل خروجة....كل دول !...أنا خايف يا أختي ينالك من ذنوبهم ... واحنا مش ناقصين ذنوب كفاية اللي فينا...
بالله عليك راجعي نفسك ..مفيش وقت للتأجيل ...مفيش وقت للتردد..أصل ده أمر ديننا...منقدرشي نقول لأ...مفيش بديل علشان ندور عليه.... مش موضوع حرية شخصية زي ما البعض بيدعي نسأل الله العافية...
أنا دلوقتي هأعرض عليك باختصار الشروط اللي المفروض تكون متوفرة في الحجاب بتاعك علشان يبقي حجاب تمام وصحيح بإذن الله.. هتراجعيها نقطة نقطة...خليها وقفة صدق مع نفسك.... قبل ما تبدأي لازم تفتكري أن احنا جايين الدنيا دي لهدف عبادة الله سبحانه...قال تعالي: ((وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ))[الذاريات : 56],,,دائما ضعي هدفك قدامك...هدفك الجنة...أنت طلبك الجنة...
أوعي تعدي الكلام عليكي زي كل مرة .. 1) هل حجابك يستر كل بدنك ؟؟ ولا بيظهر شوية شعر من قدام أو يبين جزء من رقبتك ؟؟ أوعي تلبسي مع الحجاب لبس ضيق أوي...عايزين اللبس الفضفاض الواسع ولا بيوصف ولا بيشف.. 2) أختي...هل حجابك زينة في حد ذاته ؟ ..لو كده يبقي غلط لأن الحجاب المفروض يستر زينتك مش يبقي هو أصلا زينة ملون ومنظره ملفت للانتباه... 3) هل حجابك تقيل مش بيشف؟...أوعي يظهر اللي تحته يا أختي... 4) هل حجابك واسع مش ضيق ؟...لازم ميكونشي بيوصف جسمك.. 5) أختي هل حجابك متعطر ؟؟ لو بتحطي عطر من اللحظة دي توبي إلي الله واستغفريه وماتعمليش كده تاني...لسه قايلين الحديث من شوية... 6) هل حجابك يشبه ملابس الرجال ؟ مينفعشي برضه علشان الامر فيه لعن والعياذ بالله... 7) هل حجابك يشبه ملابس الكافرات ؟ يعني لبس زي بتوع غير المسلمين...لازم حجابنا يشبه الحجاب الإسلامي الصحيح مش زي الكافرات والعياذ بالله.. أختي هل حجابك تقصدين به الشهرة بين الناس ؟ لا يا أختي أصلحي نيتك...لن ينفعك إلا الله..ابتغي بحجابك مرضاته سبحانه... ثمانية شروط يا أختي أوعي تخالفي منها أي شرط... يللا بقي علشان لما تحققيهم إن شاء الله تدعي صاحبتك اللي متعرفشي علشان تبقي زيك...وتأخذي ثوابها .. يللا بقي يا أختي اشتقنا لجيل التمكين.... يللا عايزين جيل صحوي حقيقي...
أختي أنت اللي هيكون النصر علي إيدك بإذن الله.. أيوة أنت يا اللي بتقرأي دلوقتي...صدقيني...مهما كان مستواك...هتقدري تحسنيه إن شاء الله..وتحضري النصر لأمتنا... بس أنت أخلصي النية لله تعالي وابدأي يا أختي لا تنامي.. يللا واحنا كلنا هندعي لك... وقولي آمين.... الحمد لله رب العالمين والصلاة والسلام علي رسوله صلي الله عليه وسلم اللهم ارزق كل بنات المسلمين الحجاب الصحيح اللهم أكرم كل بنات المسلمين اللهم اجعل لمن قررت من الآن أن ترتدي الحجاب الصحيح فاجعل لها نصيبا من نصر أمة الإسلام يا رب.. اللهم من قررت من الآن أن تترك المعاصي وتبتعد عن الأهواء..وقررت أن تسلك الطريق المستقيم...اللهم تقبل منها يا ربنا وثبتها علي الحق... اللهم ارحمها واغفر لها وارزقها الفردوس الأعلي.... اللهم يسر لها الطريق...اللهم أرها الحق حقا وارزقها اتباعه...وأرها الباطل باطلا وارزقها اجتنابه اللهم وفق كل من قررت من اللحظة أن تقتدي بأمهات المؤمنين و ارزقها الصبر.. اللهم ارزقها لذة النظر إلي وجهك الكريم في غير ضراء مضرة ولا فتنة مضلة.. آمين آمين والحمد لله رب العالمين وصلي الله وسلم وبارك علي نبينا محمد وعلي آله وصحبه أجمعين منقووووووووووووووووووووووووووووووووووول
saber_ezzat ($ ♥ عضــ متميز ــــو ♥ $)
الجنس : منين :
موضوع: رد: يوووووووووووووه.....تانى عن الحجاب الأربعاء أغسطس 05, 2009 5:58 pm
جزاكى الله خيرا
عازفة القمر عضو شدد حيلو
الجنس :
موضوع: رد: يوووووووووووووه.....تانى عن الحجاب الأربعاء أغسطس 05, 2009 6:04 pm
أختي هل حجابك تقصدين به الشهرة بين الناس ؟ لا يا أختي أصلحي نيتك...لن ينفعك إلا الله..ابتغي بحجابك مرضاته سبحانه...
