بحبك ..طيب اعمل ايه يعني؟

(( فى الجامعة ))
هو - بحبك
هي = طيب
هو -باقولك بحبك
هي = أوكى عرفت خلاص
هو - يابنى ادمه انا بحبك بجد
هي = طب وانا اعمل ايه.؟
هو -حبينى زى مابحبك
هي = انا باعتبرك اخ وصديق ومابافكرش فيك غير كده
هو - انتى متحجرة الاحساس والمشاعر..تلاقى فيه حد تانى فى حياتك
هي = وهو لو انا ما حبيتكش يبقى بحب غيرك؟؟ تفكير غريب جدا
هو - ارجوكى ادينى الفرصة..افتحى قلبك لحبى وجربى,
ماتظلمنيش..لو ماحبيتينيش انا هاموت نفسي
هي =لا وعلى ايه..خلاص ياسيدى ..اعتبرنا مرتبطين مؤقتا
هو - هاعيشك ملكة متوجة على عرش حياتى كلها..أنا ليكى وملك ايديكى..احلمى وأحلامك أوامر
ـــــــــــــــــــــ
(( فى البيت ))
هي = معقول يكون فيه حد ممكن يحبنى الحب دا كله؟؟
طب أنا رافضاه ليه؟
مش ممكن تكون سعادتى معاه؟
انسان رائع..رقيق..حساس وبيحبنى
أنا هاحبه زى ماهو بيحبنى..لأ..أكتر ماهو حبنى
ـــــــــــــــــــــ
(( على التليفون ))
هو -عازمك النهارده على الغدا والسينما
هي = افندم؟؟
هو - ايه..كلامى غامض؟
هي = انا اسفه..ماقدرش اخرج معاك مادام علاقتنا مش رسمية
هو - اتنين بيحبوا بعض ومن حقهم يتشاركوا اللحظات الحلوه مع بعض..دى خروجة بريئه.. عاوز نكون على راحتنا مع بعض
هي = مش هاينفع
هو - يبقى انتى مش بتحبينى
هي = طب قولى انت..لو انا اختك..هاترضى انى اخرج مع واحد تانى غريب؟
هو -( بغضب) لأ طبعا..دانا كنت قطمت رقبتك
هي = امال عايز تخرج معايا ليه؟
هو -آآه.. دى حاجه ودى حاجه تانيه
هي = هو انا مش بنت ناس برضه وليا أخ؟؟
هو - أنا مش هاثق فى أى حد تانى..لكن انا عارف نفسي وانتى عارفانى
هي = المبدأ واحد.. أخويا برضه ما يعرفكش
هو - انتى بتثبتيلى دلوقتى انك مش بتحبينى..متشكر قوى على الجرح اللى سبتيه جوايا
هي = وهو يا كده يا إما مش بحبك؟
هو - انتى مش واثقه فيا..وانا بحاول اعمل المستحيل عشان أسعدك..ليه ياربى عذبتنى بالحب؟ليه خلقتلى قلب وعلقته بانسانه قاسيه مش مقدره حبى؟
هي = خلاص خلاص..أنا اسفه..بس اوعدنى انك مش هاتكررها تانى
هو - اليها لوقتها..هاستناكى قدام السينما الساعه 6 بالليل
ـــــــــــــــــــــــــــــــ
(( فى البيت ))
هي = معلش..تضحية صغيره مش هاتضر حد..ماكانش لازم اكسر قلبه واقابل حبه بقسوه
هواللى عملته ده صح ولا غلط؟
..بلاش أفكر كتير..هو بيعمل كده عشان بيحبنى وعايز يسعدنى..هدية بسيطة منه مش لازم ارفضها
ماحدش بقى بيحب الحب ده كله فى زماننا ده
ــــــــــــــــــــــــــــــ

(( فى السينما ))
هي = انت مش قلتلى انه فيلم خيال علمى؟؟
دا طلع فيلم رومانسي
هو - حبيت اتفرج عليه انا وانتى..قصته رائعه..وكأنها اتعملتلنا
هي = ومالقتش مكان أحسن من اخر صف فى القاعه
هو - أعمل ايه بس..جينا متاخرين والصفوف قدام كلهامحجوزة
هي = الصاله شبه فاضيه..كلامك مش مريحنى
هو - ارجوكى بقى..احنا هانقلبها خناقه ولا ايه..عيشي معايا اللحظه
هي = ايه ده؟..ايه السفاله دى..ابعد ايدك عنى..انت بتعمل ايه؟
هو - انا بحبك قوى..صعب أتحكم فى نفسي وكل جمالك ده
قدامى..نفسي أشوف شعرك..اقلعى الايشار
هي = انت اتجننت؟
والله لو ما لميت نفسك هافضحك فى السينما كلها
هو - يبقى هاتفضحى نفسك اولا واخيرا..الناس شايفينا داخلين مع بعض وقاعدين مع بعض..انتى فاكره انهم مش فاهمين احنا دفعنا بقشيش زياده عند الشباك ليه؟؟
هي = انت دفعت لوحدك وانا رحت اجيب الفيشار, واتفاجئت لما لقيت رقم التذاكر بتاع القاعه دى والصف الأخرانى ده
هو - انا بحبك وباموت فيكى.. عايز اترجم الحب ده لواقع..أنا ملكك وانتى ملكى,روح واحده فى جسمين..خلينا نتعامل كجسم واحد
هي = اللى انت بتعمله ده حرام
هو - انا بحبك..وحبى ليكى هايفضل موجود دلوقتى وبعد ما نتجوز..هاتفرق ايه أكتر من ورقة مأذون؟؟
انتى مش واثقه فيا ولا انتى مش بتحبينى؟
هي = حبك عاوزنى أكسر كل اللى اتربيت عليه
هو - الزمن دلوقتى غير الزمن..وانا وانتى شباب مثقف, وانا مؤمن باحتياجاتك زى مانتى عارفه ان ليا احتياجات
اكتر حاجه عجبتنى فيكى أفكارك الحرة المنطلقة وثقافتك العالية وشخصيتك المستقلة..لكن اللى شايفه دلوقتى واحده شرقية بفكر متخلف بترمى كل أفكارها ورا ظهرها لحظة الاختبار الحقيقى..أنا اسف على كل لحظة افتكرتك فيها بتحبينى بجد..انا حظى كده..كل ما أعمل حاجه أحاول أثبت حبى ليكى بيها تفسريها تفسيرات بشعه وتطلعينى أنا الغلطان فى الاخر
هي = أنا عارفه انك بتحبنى..وانا كمان بحبك...لكن...انا..مش
هو -بحبك وبحب كل حاجه فيكى..انتى جميله قوي
هي = انا حاسه ان كل الناس بتبص علينا
هو - ماتخافيش ..طول مانتى معايا مالكيش دعوه بحد..دى حياتنا وهانحب بعض بطريقتنا

ــــــــــــــــــــــــــــــــــ

(( فى البيت ))
هي = تأنيب ضمير فظيع جوايا..انا ايه اللى عملته ده؟؟
عقلى كان فين لما وافقت؟؟..
يارب سامحنى أرجوك..ماقدرتش استحمل كل الضغط ده على اعصابى
ـــــــــــــــــــــــ

(( فى الجامعة ))

هو - ها يا حبيبتى..تحبى نروح فين النهارده؟
هي = مش رايحه فى حته وكفايه بقى لحد كده؟؟
هو - ايه الكلام ده يا حياتى؟
هي = كفايه أرجوك..حاجات كتير قوى جوايا اتغيرت بسببك..بقيت مش أنا.. كلامك دايما هو اللى بيمشى حتى لو انا رافضاه
هو - كلامك ده اكبر دليل انك مش بتحبينى
هي = ارحمنى بقى من الكلمه دى..انت بتحطنى تحت ابتزاز عاطفى بشع وكل ما أحاول ارجع لنفسي تتهمنى انى مش بحبك .. انا عملت كل حاجه ممكنه عشان مش عايزه اخسرك..اتنازلت عن حاجات كتيره قوى..ضعفت قدام توسلاتك
هو - انتى اللى كنتى عايزه كده..كل مره ترفضى وتتمنعى, وبرضه فى الاخر توافقى..انا ماضربتكيش على ايدك وما اجبرتكيش على حاجه
هي = بعد كل الابتزاز العاطفى ده؟؟
هو - ماحدش يقدر يجبر حد على حاجه..كان عندك مطلق الحرية انك ترفضى
هي = مع كل الضغط ده..ماكنتش قادره افكر
هو - ماتحاوليش تلعبى معايا دور القديسة اللى الشيطان غواها..انتى تلاقيكى اصلا كده..كلكم كده وتستاهلوا اللى يجرالكم
هي = انت حيوان بتمشيه رغباته..
هو - انا عمرى ما ضحكت على نفسي ولا عليكى...بالعكس بقى..انا استحملتك كتير قوى..استحملت عندك وسخافتك ورفضك..وكل مره باقول بكره هاتعقل..دلوقتى أنا اللى باقولك مش عايزك..ولا عايز أشوف خلقتك تانى ولو بالصدفة
وماتحاوليش تحكى لأى حد على اللى كان بينا..لأن اللى هايتحرق بالنار فى الآخر هو انتى..هى دى سنة الحياه
باى ياى يا........ياللى عمرى ما حبيتك

**مشرفهـ الدردشهـ** الجنس : منين :

بجد يا محمود قصة رائعة وفعلا دى الطرق الى بتقع البنات بيها فى الغلط

والله بجد قصة فيها عبرة ويارب الناس تعتبر

بمسمى الحب بيعملو بلاوى وبتتنازل مرة وبعد كدة بتخرب

تسلم ايديك يا محمود وتقبل مرورى

تسلم ايدك يا محمود
بجد بنات كتير بيقعوا ف نفس المشكلة :478745613212:

بجد هى العبط راكبها من فوقها لتحتها

ازاى تامن لواحد وتديه قلبها ومشاعرها بمنتهى السهولة كدة

وازاى تبيع نفسها بارخص تمن ممكن حد يشتريها بيه

انا عارفة ان البنات الكلام العاطفى بيدوخهم لكن لازم هى تبقى قوية قدام استفزاز عاطفى بالطريقة دى

وبعدين مهما كان الى قدامها بيحبها فلاول ما يقولها الى قالهولها دة فى السينما

بجد كان لازم يسقط فى نظرها وتعرف وتتأكد انه مش بيحبها وانه مستحيل يكون فى يوم من الايام حبها

أنه ببساطة مش خايف عليها

بصراحة الى يتلام فى الموضوع دة كلو هى لأنها مقدرتش تحافظ على نفسها كويس

بجد موضوع فوق الرائع للمناقشة والحوار والحركات دى بتحصل كتير بس بجد الولد والبنت غلطانين جداا

لأن النوع دة من العلاقات فاشل فاشل فاشل

وبجد عن تجربة شخصية عمرى ما شوفت اتنين مجوزين بالطريقة دى الا وحياتهم بايظة جدا والاسرة مفككة وفاشلة

وكل الحب الى كان فى الاول اتحول كره وكره مش طبيعى لدرجة ان الاولاد ضاعو بين عنادهم لبعض

والله مفيش احلى من ان البنت تحافظ على نفسها وعلى مشاعرها

وتستنى ابن الحلال الى يجى يخطبها من ابوها

ويدفع فى مهرها غااالى ويتعب جدا على ما يطول شعرة منها او حتى كلمة ناعمة منها

ساعتها هى بتبقى اغلى عنده من كنووز الدنيا كلها وبيحافظ عليها زى عنيه ويمكن اكتر

معلش انا عارفة انى طولت عليكم

بس بجد الكلام لقيته محشوور فى زورى فقلت لازم يطلع بقى

وتقبل مرورى الطويل جدااا دة يا حوودة

عضو جديد الجنس : منين :

قصة جميلة اوى يامحمود
تسلم ياجنتل على التوبيك الرائع دة
_____________________

دة خارج التوبيك دة

بس نصيحة منى احسنلك متحبش لانك هتتخان ف الاخر

عضو فعال الجنس :

الله يعطيك الف عافية موضوع رائع جدا

» بحبك يا مني .. مش وقته يا احمد .. بحبك يا احمد .. قومي نامي يا منى
» اعمل دون لود لاى برنامج من انتاج شركه adobe cs4 كامل
» اعمل كول تون موبينيل ب 150 قرش واليكم احدث الاكواد باستمرار
» مفيش فايدة ف الادمان (ادمانا ادمان يعني مش اي كلام)والاثبات بالصور
» اضحك على أصحابك وخللى صورهم الثابتة تتحرك وتتكلم مع (3d me now pro 2) اعمل أجمد مقالب